aragones    castellano    català

Una escuela que obliga a ninos activos a aposentar-se en os suyos escriptorios ta estudiar as materias mas inutils ye una escuela dolenta. No ye buena so que ta los que creyen en ista manera d'escuela, ta os ciudadanos a los que falta la creatividat que quieren fer formar ninos mansos, sin facultatz creyaderas, ninos que s'achustaran bien a un tipo de civilizacion an que la norma d'exito ye ganar diners.

A. S. Neill, El nuevo Summerhill

ASOCIA-TE veyer Socios

¿Qui somos?

A Escuela de Verano del Altoaragón (EVA) ye un Movimiento de Renovacion Pedagochica (MRP) formau por docents y  personas ligadas a'l mundo educativo, que encomenzo as suyas actividatz en 1984 en Aragon (España). Ditas actividatz no s'arroclan arredol d'una etapa concreta nian arredol de l'Amostranza Obligatoria, perque entendemos a Educacion como un continuo. Por ixo as nuestras propuestas van dende a Educacion Infantil hasta la Educacion de Personas Adultas amas de la Educacion Primaria, Secundaria, Bachillerato y Formacion Profesional, Idiomas o Artistica sin ixublidar, prou, a las familias.

O nuestro colectivo lo forman personas preocupadas por as qüestions educativas, en las que la participacion suya se basa en a reflexion sobre a practica diaria y en una formacion que parta de lo que de verdat precisan as Comunidatz Educativas d'os centros. D'asti a nuestra participacion en o Consello d'a Choventut d'Aragon y en as mesas de treballo que han feito la suya fayena a ran estatal: escuela rural, Educacion Secundaria, interculturalidat y asinas-asinas. Practica, pensamientos y investigacion que contrastam contino con os atros MRPs y que se coordina en a Mesa Estatal de la Confederacion an que femos parte.

Amas la EVA espenta y promueve l'emplego real d'as luengas propias d'Aragon, aragones y catalan (y as suyas variedatz, como podretz veyer a ista web), como parte important d'o patrimonio que hemos d'esfender. A luenga ye una parte no tresallable de las personas per lo que hemos de parar-ie cuenta mientras o proceso d'amostranza y aprendizache ta un desembolic integral y digno de l'alumnalla; no coma una curiosidat folklorica que cada uno  fera servir en a suya casa si no como una realidat que hemos de fer explicita, visible y publica en a vida diaria d'os nuestros centros. Pero...

¿Quals son os nuestros alazetz?

Dende l'encomenzar d'os anyos uitanta, o profesorau que ha iu animando y formando iste colectivo bebeba de bellas fuents que ya podriam decir "clasicas": Paulo Freire y a suya apuesta per prener a parola y fer un trango enta l'accion, Celestin Freinet y as suyas tecnicas ta que a vida entrase ta cutio en l'aula, as investigacions de Piaget y tot lo que plegaba de Vigotsky, gracias a la fayena d'ixemenar d'a editorial  Pablo del Río. D'asti que siempre nos haiga feito goyo o luengache como formador que d¡o pensamiento, a reflexion sobre a pragmatica que tanto nos facio aprender sobre l'uso sexista d'a luenga.

Imprescindible ha siu a figura hue ixublidada de Lorenzo Miliani y a suya experiencia d'a doposcuola de Barbiana que ha teniu como texto de referencia Carta a una maestra que pasó ta devant en os anyos 60 d'o sieglo pasau a la ideya de competencias que tanto marcha en istes tiempos.

Iste colectivo ha mirau de colar-se en a corrient de la pedagochia critica tenindo como referencias ta remirar a practica, ideyas y obras de Freire, Henry Giroux y Peter McLaren.

A pedagochia critica ye una propuesta d'amostranza que mira d'aduyar a os estudiants a qüestionar las ideyas y creyers que la fan. En atras palabras, ye una teoria y practica an que os estudiants plegan a una consciencia critica. O profesorau treballa ta menar a os estudiants a qüestionar as teorias y as practicas tenidas por represivas (tamien las de la misma escuela), animando a os alumnos a fer respuestas liberaderas quanto a ran individual quanto colectivo que desemboliquen en cambios en as suyas actuals condicions de vida.

Creyemos en a Comunidad Educativa, en o conchunto de personas que fan piet y son responsables d'a educacion d'os que son en edat d'escolarizacion obligatoria. D'isto pensamos que a funcion educativa ye fayena primero d'as familias y dimpues d'o centro escolar. Fer parti totz d'a Educacion ye l'alazet, per ixo ye preciso cambiar as competencias d'os Consellos Escolars ta que sigan organos de participacion real, y no pas organos formalistas y burocraticos con una representatividat sectorializada y poco plegada a la realidat actual.

A educacion ye un compromis de toda la sociedat. Cal enantar cada vez mas en prochectos y programas que s'ocupen de fer formar a toda la ciudadania y que de vegada puedan estar aprofeitaus por os centros escolars.

As ciudatz y lugars han de fer plegar os suyos recursos y servicios a os centros educativos y enantar en as formas de participacion d'os suyos ciudadanos mas chicotz. Asinas, a obra de Francesco Tonucci mos pareix l'alazet de tanto.

L'unico camin ta tener a l'alumnalla en contacto contino con a vida; a misma escuela ha de estar catalizadera de l'arredol vivo, ta que ixe dentre en l'aula. Ye un alazet la observacion y l'amanamiento a la realidat fisica y social mas aplegada a os alumnos. Por ixo o centro escolar ha d'adibir a o suyo prochecto educativo os medios que l'ufre l'arredol y aprofeitar-los ta fer realidat os obchectivos educativos suyos.

A participacion ye una valor basica en a sociedat actual. Cal que l'apredizache d'ista valor la faigamos fomentar en l'aula y o centro. Hem de fer prochectos de participacion en os centros que sobreixcan l'aro educativo de l'alumno estricto, familias y profesorau.

Leye aquias bases acordadas con a Confederacion de MRP de l'Estau.

Ta acabar queremos dixar bien platero que creyemos en a Escuela publica, una escuela innovadera, laica, plural y de calidat.